न्युयोर्क सिटीले डिसेम्बर १५ र २२ सम्ममा कोभिड भ्याक्सिन पाउने

www.khasokhas.com

आगामी साता खाद्य तथा औषधी प्रशासन एफडीएले भ्याक्सिन स्वीकृत गर्ने अपेक्षा भइरहँदा न्युयोर्क सिटीले कोरोनाबिरुद्धको भ्याक्सिन वितरणको योजना बनाएको छ । न्युयोर्क सिटीमा उच्च जोखिममा रहेका स्वास्थ्यकर्मीहरु र नर्सिङ होममा रहेकाहरुलाई पहिलो प्राथमिकता दिइने भएको छ ।

फाइजरको भ्याक्सिन न्युयोर्कमा डिसेम्बर १५ मा आइपुग्ने भएको छ । त्यस्तै मोडेर्नाको भ्याक्सिन डिसेम्बर २२ मा आइपुग्नेछ । त्यतीबेलासम्म दुबै भ्याक्सिनले एफडीएबाट स्वीकृति पाउने अपेक्षा गरिएको छ । न्युयोर्क सिटीले भ्याक्सिन वितरणका लागि संघीय सरकारसँग नजिकबाट काम गरिरहेको छ ।

न्युयोर्क सिटीमा सबैले भ्याक्सिन पाउन भने केही महिनासम्म लाग्नसक्ने मेयर बिल ब्लाजिओले बताएका छन् । न्युयोर्क सिटीमा साप्ताहिक रुपमा भ्याक्सिनका डोजहरु आउने उनले बताए । सबैभन्दा बढी प्रभावित २७ क्षेत्रमा रहेका स्वास्थ्यकर्मीहरु र नर्सिङ होममा रहेकाहरुले सुरुमा भ्याक्सिन पाउनेछन् ।
न्युयोर्क सिटीले ३ लाख २० हजार फाइजरको भ्याक्सिन प्राप्त गर्ने र माइनस ८० डिग्री सेल्सियसमा स्टोर गर्ने तयारी गरेको छ । त्यस्तै अरु लाखौं मोडेर्नाका भ्याक्सिन स्टोरका लागि योजना बनाएको छ । अहिले न्युयोर्क सिटीसँग अस्पतालहरुको सहायतामा डेढ मिलियन डोज भ्याक्सिन स्टोर गर्ने क्षमता रहेको छ ।

अमेरिकाले फेब्रुअरीसम्म  एकतिहाई जनसंख्यालाई भ्याक्सिन दिने योजना बनाएको छ । ट्रम्प प्रशासनको भ्याक्सिन कार्यक्रमको नेतृत्व गरिरहेका डाक्टर मोन्सेफ स्लाओवीले फेब्रुअरीसम्म अमेरिकामा एकसय मिलियनलाई भ्याक्सिन वितरण गर्न अमेरिका सफल हुनसक्ने बताएका छन् ।

जोन्सन एण्ड जोन्सनको भ्याक्सिनले प्रयोगको स्वीकृति पाएमा अमेरिकाले अझ बढी भ्याक्सिनका डोजहरु प्राप्त गर्नसक्ने देखिएको छ । अमेरिकाको खाद्य तथा औषधी प्रशासनबाट फाइजरको भ्याक्सिनले स्वीकृति प्राप्त गर्नासाथ संघीय सरकारले देशभर २४ घण्टामा साढे ६ मिलियन डोज सप्लाई गर्न सक्ने क्षमता राख्छ ।

त्यस्तै मोडेर्नाको भ्याक्सिनले पनि प्रयोगको अनुमति पाएमा २४ घण्टाभित्र साढे १२ मिलियन डोज भ्याक्सिन सरकारले देशभर सप्लाई गर्ने योजना बनाएको छ । अबको झण्डै दुईसातामा अमेरिकामा भ्याक्सिन वितरणको योजना बनाइएको छ । फाइजरको भ्याक्सिनले डिसेम्बर १० मा स्वीकृति पाउने अपेक्षा गरिएको छ ।

अमेरिकामा सुरुमा स्वाीथ्यकर्मीहरु र दीर्घकालिन हेरचाह केन्द्रमा रहेकाहरुलाई भ्याक्सिन दिने पक्षमा सीडीसीमा मतदान भएको छ । अमेरिकामा २१ मिलियन स्वास्थ्यकर्मीहरु रहेका छन् भने ३ मिलियन दीर्घकालिन हेरचाह केन्द्रमा रहेकाहरु छन् । मेडिकल विशेषज्ञहरुले स्वास्थ्यकर्मीहरु, पहिलेदेखि नै स्वास्थ्य समस्या रहेकाहरु, बुढाबुढीहरु र अत्यावश्यक कामदारहरुले सुरुको चरणमा भ्याक्सिन प्राप्त गर्नुपर्ने बताउँदै आएका छन् । केटाकेटीहरु र अन्य बयस्कहरुले अन्तिममा भ्याक्सिन पाउने अपेक्षा गरिएको छ ।

संघीय सरकारले यो साताको अन्त्यसम्म भ्याक्सिन वितरणको सबै योजनालाई अन्तिम रुप दिनका लागि राज्यहरुलाई भनिसकेको छ । राज्यहरुले अमेरिकामा रहेका ३३१ मिलियनलाई कसरी भ्याक्सिन दिने भन्नेबारे प्रारम्भिक योजना सीडीसीलाई बुझाइसकेका छन् ।

copied from khasokhas.com

तपाईको प्रतिक्रिया

सम्बन्धित समाचार